ALIPA OWÍTTHUNA ANAMÌKO

ALIPA OWÍTTHUNA ANAMÌKO

Por Kant de Voronha

Nwiriyane Masu a Yesu onihimya wira: “Pasopa! Mwisyakiheke khula muthinto wowítthuna, okhala wira ekumi ya mutthu khenlipana ni watta wa itthu sirinawe” (Lucas 12, 15).

Witthuna etthu enattehatteha atthu othene: amasikhini, athajiri, anamwane, amwavano hatá makhulupale. Vekekhai, witthuna onnihuruwela owitho wahu ni mwakhalelo ahu ékumi nnawehexexa epantte emosa páhi: ophwanya ni wixukelala mirerelo sinjene mpakha onattottopeliwa mmawani.

Mulaponi mwòsivelaxa musurukhu, witthuna onrwá wunjerereyaka varohoni vanamanloko. Muttehatteh’ola onnaphwanya atthu othene. Mwikasope vanjene, mana wixona osina onniniyeléliha itthu sulupalexa.

Okhala wira, ophenta, orera murima ni omulompa Muluku enkhala yowottaivela. Mutthu onihala ixupuwelaka mekhaweru páhi ni miruweryo sawe. Mwikhanyanyeke ayo, munnuweke munakelela yaiwó mwíle enivaranyu! Masi muhiliyale onikhumanyu. Muhilalihe ekumi n’ikuru sanyu mwirela withukumanyerya muhakhu páhi, khuyasareya milili n’òwali. Hóye! Mwira siso munimwihasula mahalene.

Mwiraka siso munkhala owixona osiva, munaikukumiha, ettuli khutupúuu, mpakha omela ipwetó muhiweryaka wakhaliherya ale anihawa. Muluku onnitthanela wira níyeviheke. Tthiri, ekumi ahu khenlipana n’itthu sirinahu. Mone wira, àkhala anvira ekumi aya yothene yavyaka musurukhu ohináphiyerya, hatá watekhumelaka; anteka empaya yosareya warya, erukureriwene mikukutta sihinkontheya, masi nihiku nikhwaya muaphwanya enyopotonwene, mwaha wòkhwa. Anikuxani yarowaka omahiye? Antthika matataru sintoko varwiyaya ehinètthu. Vava hi ninkuxa orerawahu murima páhi! Itthu sothene sinhala silyiwaka n’atthu akina. Tivanrerelaya ottharuwa olavilavi wothene. Okuxa murima w’èmutthu tomphaveleya.

Etthu y’omoriha ikharari owona atthu akina animwira yathajiri vale khuyaliyala amusi aya mwaha wira t’óhawa. Annipajerya khuyapattha amusi asyá arino mihakhu sa vathi, apatthani akina, annarantteliha axaraya, khanwerya wixupuwela. Masi othanathanaru ehalelaka orowa wuhwéliwa omahiye tammupuwelaya Muluku. Sothene seiyo eniwiriha mwaha wowitthuna wasukumanenle mpakha osareya mphwini. Ekina nkihimmye!

Deixe uma resposta

O seu endereço de email não será publicado. Campos obrigatórios marcados com *