WAHALA A NIHIKU

EKALAPUSU ENIRELIWA AMASIKHINI?

Por: Kant de Voronha

Makhalelo òtthukweliwa atthu ikalapuso somoçambikhe tóthananiha. Mapereço manjene khasuwenle ihakhi saya akina tiyale anitthukweliwa vohittheka etthu sinavira iyakha pili wala sinjene, íraka nlamulo nitthokihaka miyeri mithanu ni mili wattawene.

Mulaponi mwahu mu vanikhweya omutthukwela mutthu ohirina ettikitti walá omwiyale malyakhu ohikhanle omutthukwela Ministro, governatoro wahiso musatoro oiyale musokho wanamanloko. Yakhala maxefi, yoniwakaru wira àwerya wiya muhakhu Estado anwelihiwa ekhattera wira etepeke wapheleliha núxila mposto wàmasikhini. Masi ephwanyiwakaru  ekwasune emukunxe mwalyakhu òtikiniha ephattu awe, wala emukunxene celulare owiyiwa khanikohiwa vaili, anikhwela mukalapusu. Eyo exariya yakhula nihiku elapo ela yòphenteya yàtthu awaninhe ekhotto.

Sókhala soruma sinakhapelela atthu òthanleliwa wira ehitthukweliweke mukhatteya, nnamwi emwivalene mutthu malamulo ene yawo animwalevelela. Masi ela khahiyo enamuna emosá páhi yovonyoliwa ihakhi satthu. Eri wowini nto exariya? None wira aperesu anjene kharino màdvogado òwakiha nnari khasuwenle ihakhi saya. Khanisuwela tho mwettelo weprocesso aya nnari nihiku nóphukeliwa waya. Kahiliyala vale wira advogado onolinvwa epula ya muhakhu.

Ohiya-tho vo, ninnaweha akina anitthukweliwa mpuha pahi.  Onto muhakhu ene yowo amasikhini awo anrowa ophwanya wowi? Tivavo nto enaikhwela mukhatteya. Ohawa wiva! Akina tiyale ahiniphukeliwa ekumyayene.

Ikhatteya sinjene tiseiye sowattiwa vantepaxa Wamphula nno. Khino mwaha wokhala eprovincia yowattiwa atthu, wala yanttewo anasusukhi. Idistrito sohálakhanyeya sa Wamphula sinniphwanyeya ikalapusu n`aperesu òvikana mitita saya, sohikhalana opuro worupa nnari wixokola: ottapwatta nokilathi vavo, orapheya nólya vavo. Makhalelo óthananiha yawo.

Aperesu akina tiyale ahiniwerya olavula námusi aya mana animakela othamihiwa vohileliwa mutthu. Amusi aya anihala exankale vanjene. Iwora sikina khanivahiwa eyolya ehikhanle ele yamusyaya páhi. Nto xeni wawalela atthu yaphwanenle wavariha muteko wowunnuwiha elapo ntoko oservente vanitekiwa empa, walimiha mmatta ni miteko sikina?

Masi yakhanle wira makhulupale othene annivara muteko aya sintoko vanrerelaya itthu iya khisakhumelelaka, walá sanvukuwaka. Tthiri, wikhurana nóhijala wamaholeli a mitthenkeso sovirikana sastado tisinvonyoliha ihakhi sapinatamu. Ekina nkihimmye!

Deixe uma resposta

O seu endereço de email não será publicado. Campos obrigatórios marcados com *