MUREPETTHO W’ANAMANLOKO ÒMOSAMPIKHI

MUREPETTHO W’ANAMANLOKO ÒMOSAMPIKHI

Elempwe ni Junior Rafael

Okathi wapuheriwahu n’akolono, anamanloko omosampikhi yaníputthiwa, yanipotthiwa n’akunya a ilapo sokhopela (weuropa). Atthu yanipuheriwa, ovarihiwa muteko wowaturuwela, osoma yamukosoleliwa, othanyiwa, ohóneliwa vatthu hatá ovaliwa ixikola sanoripe n’irampha sene. Nkinhimya nto musurukhu, anoripe khiyatthuniheriwa ovarakasa muhakhu munjene nnari khiyasuwela murerelo aya.

Sari miyakha sinjene saiyeriwahu miruweryo s’ephattu ahu. Wahiphiya okathi atthu omosampikhi yapakiwaya marotta yatumihiwa muhakhu munjene ilapo s’okhopela. Vavo wahivira okathi aya vo pahí mpakha wisupuwela wamuharoiyahu yaisuwelenle wira nàxinene elapo ela.

Vanupuweliwa, wira, otaphuwa wahu wàkolono wamuruhela opuha w’atthu othene. Okhala wira, nakela ohóleliwaka naxinnihu èphome ahu nnikhwitipa nene noripa. Masi, vankhala wira wàri oloha okuxiwe khujipihiwa nèpheyo. Ti vavo nto, akina aninlelaya isapula sa wexipitu, ewupuwelelaka-tho akolono.

Vano nto murepettho xeni onahukhumu anamanloko? Mupuwelo aka wa khula nihiku, kinona wira atthu elapo ela annirepetthiwa naxinnaya arino owerya woholela omwene w’elapo.

Murepettho ene wakameliwa wa mapuro a muteko n’epartitu emosa páhi. Kinnona mulaponi mu othanyiwa w’ale anupuwela evirikanyaka makhalelo ànamunjene. Hatá okhala owìvala mutthu onnixuxulihiwa. Tivo nto ale anithanleliwa ohòlela maupro kamosakamo a muteko annihala ehupàreyaka vohitaphula ni murerelo. Ari otthukiwene nnari okothomola animojela mana amphavela ovarerela otokwene aya.

Anamanloko omosampikhi hata ehaxiwaka okathi munjene onophiya otaphuwa waya wanikelela. Anamanloko khanikhwa, akina eviraka, akina eyariwaka. Mwanihiku nlo opuha wàle antthapa onokisa ehaleke yojelaka wittha iphumu. Tthiri, khivo etthu ehinvira. Itthu sinnivira, masi exariya ya Muluku tehimmalamala.

Nkinwerya osuwela xeni ale yaphwanela wakhapelelaka akhwaya, yawo-tho tanikuxererya khuyarukunuwela. Vanto nathanlale apotthi ahu khuwemiherya onirepettha enipaka ipottha saya.

Mapkha silini ni makhalelo sisa? Elapo ela enathipelela okhala ehilumanyereyaka mpakha lini?

Nlipihe murima wi nirukunuxe makhalelo othene òhirerela, èpottha. Yohi ene nnowerya mmansihu oxintta mixankiho sahu wira nikhaleke orattene.

Narokhalano ovalanyiwa wowettiherya omwene, owali wammala, wamoniheriwa ephattu aya, ni vamusuweleyaka ale antthikiherya ottuli elapo ahu. Owanela murerelo w’atthu othene, khuvo onihala ottuli.

Deixe uma resposta

O seu endereço de email não será publicado. Campos obrigatórios marcados com *